كتبت الزميلة سلوى بعلبكي ” صحيح انا مش أم، بس أنا ربيت أكتر من ولد من اولاد اختي، وبعرف الحد الادنى من شعور الام. من بعد ما توفت أمي صارت فكرة الموت تلازمني يوميا وصرت واقعية اكتر من اللزوم وبتقبل فكرة الموت لأن بيقولوا انو الموت حق وكلنا على هيدي الدرب… وقت ماتت أمي قلت هيدا أقصى ما يكون من حزن ووجع، بس ما كنت بتصور انو الحزن يمكن يوصل لهيدي الدرجة… درجة الجنون لأم تفقد أبنها الوحيد. سميرة يلي كانت معلقة بإبراهيم لدرجة تضلها عندها هاجس انو تفقدو بأي وقت من الاوقات. سميرة يلي من خوفها على وحيدها تضل تقول انو “ما بعرف ليش عندي احساس انو ابراهيم ابن الموت”. ومن خوفها عليه كانت حتى تضل تشوفو بأحلامها… بس للأسف الاحلام البشعة يلي كانت تحلمها بآخر فترة عن ابراهيم تفسرت على ارض الواقع بواقع أبشع. ما بعرف اذا هيدا هوي العدل… يمكن. بس كيف فينا نقنعها انو العدل انو تفقد حبيبها ووحيدها وانو هيدي ارادة الله!. يصبر قلبك خالتي Samira Haidar ويبرد قلبك وقلب كل ام فقدت ابنها بعز شبابو.
هلق صرت افهم امي وقت كانت تقول الله يجعل يومي قبل يومكم. يا ربي شو هالوجع. وجع أكبر من الحكي. اصلا خلص الحكي قدام وجعك سميرة. ابراهيم شرارة الحنون والخلوق والطيب راح. الله يرحم روحك ويصبرك سميرة
